نیویارک:نیویارک کے لاگارڈیا ایئرپورٹ (LaGuardia Airport) پر جمعرات کی صبح ایک بڑا حادثہ ٹل گیا، جہاں شکاگو جانے والی امریکن ایئر لائنز کی پرواز کو رن وے پر پرندہ ٹکرانے کے بعد ٹیک آف ناکام بنا کر اڑان روکنی پڑی۔
فیڈرل ایوی ایشن ایڈمنسٹریشن (FAA) کے مطابق، بوئنگ 800-737 طیارہ صبح تقریباً 8:20 بجے شکاگو اوہیئر (Chicago O’Hare) کے لیے روانہ ہونے والا تھا کہ فلائٹ عملے نے طیارے سے پرندہ ٹکرانے کی اطلاع دی۔ واقعے کے فوراً بعد پائلٹ نے ایمرجنسی بریک لگا کر ٹیک آف منسوخ کر دیا۔
ایف اے اے نے واقعے کی باقاعدہ تحقیقات کا حکم دے دیا ہے۔ فی الحال یہ واضح نہیں ہو سکا کہ پرندہ ٹکرانے سے طیارے کو کتنا نقصان پہنچا یا کسی مسافر کو چوٹ آئی یا نہیں۔ واقعے کے بعد ایئرپورٹ پر کچھ دیر کے لیے فلائٹس کی آمد و رفت روک دی گئی (Ground Stop)۔
وائلڈ لائف واقعات کے اعداد و شمار: ایف اے اے کی رپورٹ کے مطابق، رواں سال کے دوران لاگارڈیا ایئرپورٹ پر پرندے یا جنگلی حیات ٹکرانے کے 94 واقعات سامنے آ چکے ہیں، جبکہ 1990ء سے اب تک ایسے 3,800 سے زائد واقعات ریکارڈ کیے جا چکے ہیں۔
پرندہ ٹکرانے کے واقعے کے علاوہ، خراب موسم کے باعث لاگارڈیا ایئرپورٹ سے پروازوں کی روانگی میں اوسطاً 45 منٹ کی تاخیر بھی دیکھی گئی۔