تاریخ: 6اپریل 2025
نیویارک: نیویارک میں پاکستان کے قونصلیٹ جنرل نے ‘آکسفورڈ پاکستان پروگرام’ (OPP) کے تعاون سے ایک خصوصی تقریب کی میزبانی کی، جس کا مقصد پاکستانی نژاد طلبہ کے لیے اعلیٰ تعلیم کے مواقع کو وسعت دینا اور اس پروگرام کی کوششوں کے بارے میں آگاہی فراہم کرنا ہے۔
اس اقدام کے ذریعے یونیورسٹی آف آکسفورڈ میں پاکستانی اور پاکستانی نژاد طلبہ کی نمائندگی بڑھانے کے لیے وظائف (Scholarships) اور تعلیمی سہولیات فراہم کی جاتی ہیں۔
یہ پروگرام نہ صرف پاکستان بلکہ دنیا بھر میں مقیم پاکستانی تارکینِ وطن کے باصلاحیت طلبہ کے لیے آکسفورڈ جیسی عالمی درسگاہ میں داخلے کی راہیں ہموار کرتا ہے۔
تقریب کا آغاز قونصل جنرل عامر احمد اتوزئی کے استقبالیہ کلمات سے ہوا۔ انہوں نے اپنے خطاب میں تعلیم کے شعبے میں سرمایہ کاری اور پاکستانی نوجوانوں کو بااختیار بنانے کی اہمیت پر زور دیا۔
عامر احمد اتوزئی نے کہا کہ آکسفورڈ پاکستان پروگرام جیسے اقدامات عالمی سطح کی یونیورسٹیوں میں پاکستانیوں کی تعلیمی نمائندگی کو مضبوط بنانے اور عالمی پاکستانی کمیونٹی کے درمیان تعاون کو فروغ دینے میں کلیدی کردار ادا کرتے ہیں۔
پاکستانی قونصل خانہ ایسے تمام منصوبوں کی حمایت جاری رکھنے کے لیے پرعزم ہے جو پاکستانی طلبہ کے لیے بامقصد تعلیمی مواقع پیدا کرنے اور عالمی سطح پر ان کی رسائی کو ممکن بنانے میں مددگار ثابت ہوں۔