ریاض (ویب ڈیسک): پرتگال کے معروف فٹبالر کرسٹیانو رونالڈو کے سعودی عرب چھوڑنے سے متعلق خبریں سامنے آنے کے بعد صورتحال غیر واضح ہو گئی ہے۔
بین الاقوامی میڈیا رپورٹس میں منگل کو دعویٰ کیا گیا تھا کہ رونالڈو کا 81 ملین ڈالر مالیت کا نجی طیارہ پیر کی شام ریاض سے اسپین کے شہر میڈرڈ کے لیے روانہ ہوا۔ یہ خبریں ایسے وقت میں سامنے آئیں جب ریاض میں امریکی سفارت خانے پر ایرانی ڈرون حملے اور خطے میں بڑھتی ہوئی کشیدگی کی اطلاعات گردش کر رہی تھیں۔
تاہم پریس ایسوسی ایشن اور بعض عرب میڈیا اداروں کے مطابق کرسٹیانو رونالڈو اس وقت بھی سعودی عرب میں موجود ہیں۔ رپورٹس میں بتایا گیا ہے کہ اگرچہ ان کے طیارے کے یورپ روانہ ہونے کی تصدیق ہو چکی ہے، لیکن یہ واضح نہیں ہو سکا کہ رونالڈو یا ان کے اہلِ خانہ اس پر سوار تھے یا نہیں۔
یہ پیش رفت ایسے وقت میں ہوئی ہے جب ایشین فٹبال کنفیڈریشن نے خطے میں سیکیورٹی خدشات کے باعث کئی میچز ملتوی کر دیے ہیں، جن میں النصر کا اے ایف سی کوارٹر فائنل بھی شامل ہے جو دبئی میں کھیلا جانا تھا۔
دوسری جانب سعودی پرو لیگ کے میچز فی الحال جمعرات سے ہفتے تک طے شدہ شیڈول کے مطابق جاری رہیں گے، جبکہ النصر اور نیوم کے درمیان مقابلہ ہفتے کو ریاض میں ہونے کا امکان ہے۔