نیوجرسی(ویب ڈیسک): فیفا ورلڈ کپ 2026 کے موقع پر لاکھوں شائقین کی آمد کو مدنظر رکھتے ہوئے نیو جرسی حکام نے ٹرانسپورٹ کا ایک جامع پلان تیار کر لیا ہے۔ این جے ٹرانزٹ (NJ Transit) اور نیو جرسی ٹرن پائیک اتھارٹی کے درمیان ہونے والے معاہدے کے تحت، میٹ لائف اسٹیڈیم کے لیے بس سروس میں بڑے پیمانے پر اضافہ کیا جائے گا۔
ورلڈ کپ کے دوران میٹ لائف اسٹیڈیم میں فائنل سمیت 8 میچز کھیلے جائیں گے۔ ٹریفک کے دباؤ اور حادثات سے بچنے کے لیے این جے ٹرانزٹ نے 85 اضافی بسیں چلانے کا فیصلہ کیا ہے جو سیکاکس جنکشن (Secaucus Junction) سے شائقین کو اسٹیڈیم پہنچائیں گی۔
حکام کا کہنا ہے کہ اس اقدام کا مقصد سڑکوں پر ہجوم کو کم کرنا اور شائقین کو محفوظ سفر فراہم کرنا ہے۔ اس سروس کے لیے نجی کمپنیوں ‘ٹرانسپورٹیشن مینجمنٹ سروسز’ اور ‘اے یانکی لائن’ کے ساتھ معاہدے کیے گئے ہیں تاکہ بسوں کی کمی نہ ہو۔ یاد رہے کہ ورلڈ کپ کا فائنل 19 جولائی 2026 کو اسی اسٹیڈیم میں منعقد ہوگا۔
