دبئی/نیویارک: حکومتِ پاکستان نے نیویارک کے قلب (مین ہٹن) میں واقع اپنے ملکیتی ‘دی روزویلٹ ہوٹل’ کو ایک بڑے ری ڈویلپمنٹ پروجیکٹ میں تبدیل کرنے کے لیے فیصلہ کن قدم اٹھا لیا ہے۔ اس منصوبے کے تحت 4 سے 5 ارب ڈالر کی مشترکہ سرمایہ کاری حاصل کیے جانے کا امکان ہے۔
حکومت مارچ کے پہلے ہفتے تک ایک مالیاتی مشیر (Financial Adviser) مقرر کرے گی جو اس ڈیل کو حتمی شکل دے گا۔
نئے ماڈل کے تحت ہوٹل کی ملکیت پاکستان انٹرنیشنل ایئر لائنز (PIA) کے پاس ہی رہے گی۔
ایک بین الاقوامی پارٹنر تعمیرات، تزئین و آرائش اور آپریشنز کے لیے فنڈز فراہم کرے گا۔
مشیرِ نجکاری محمد علی کے مطابق، مقصد اثاثہ بیچنا نہیں بلکہ اس سے طویل مدتی منافع حاصل کرنا ہے۔
1924 میں قائم ہونے والا یہ ہوٹل کبھی نیویارک کی شان و شوکت کی علامت تھا، لیکن 2020 میں بند ہونے کے بعد سے یہ کھنڈر بنتا جا رہا تھا۔ حالیہ برسوں میں اسے تارکینِ وطن کی پناہ گاہ کے طور پر استعمال کیا گیا، جس کی وجہ سے اس کی حالت مزید ابتر ہوگئی اور مقامی سطح پر اسے ‘آئی سور’ (Eyesore) یا بدنما داغ قرار دیا جانے لگا۔ اب اسے ایک جدید ترین عمارت میں تبدیل کر کے اس کی تاریخی حیثیت بحال کی جائے گی۔
پاکستان نے اس منصوبے کے لیے امریکہ کے ساتھ ایک مفاہمت کی یادداشت پر دستخط کیے ہیں۔ یہ معاہدہ صدر ڈونلڈ ٹرمپ کے دور میں امریکی خصوصی ایلچی اسٹیو وٹکوف کے تعاون سے طے پایا۔
نائب وزیراعظم اسحاق ڈار کا کہنا ہے کہ یہ قدم پاکستان کی اس حکمت عملی کا حصہ ہے جس کے تحت ایک طرف چین کے ساتھ سی پیک (CPEC-II) کو آگے بڑھایا جا رہا ہے اور دوسری طرف امریکہ کے ساتھ تجارت، ٹیکنالوجی اور سرمایہ کاری میں تعلقات کو نئی جلا بخشی جا رہی ہے۔
روزویلٹ ہوٹل نیویارک کے مشہور گرینڈ سینٹرل ٹرمینل کے قریب واقع ہے اس جائیداد کی موجودہ مالیت 1 بلین ڈالر سے زائد بتائی جاتی ہے۔
ری ڈویلپمنٹ کے بعد یہ ہوٹل نہ صرف پاکستان کے لیے زرمبادلہ کا ذریعہ بنے گا بلکہ پاک-امریکہ تجارتی تعلقات میں ایک سنگ میل ثابت ہوگا۔
