نیویارک: اقوام متحدہ کے سیکرٹری جنرل انتونیو گوتریس نے ماہِ رمضان کی آمد پر دنیا بھر کے مسلمانوں کے لیے نیک خواہشات کا اظہار کرتے ہوئے اسے امن اور بھائی چارے کا مہینہ قرار دیا ہے۔
اپنے خصوصی پیغام میں سیکرٹری جنرل نے رمضان المبارک کی اہمیت پر زور دیتے ہوئے کہا کہ:”دنیا بھر کے مسلمانوں کے لیے رمضان محض ایک مہینہ نہیں بلکہ عبادات، ایثار اور غور و فکر کا ایک بابرکت باب ہے۔ یہ مقدس مہینہ امید اور امن کے اعلیٰ انسانی نصب العین کی حقیقی نمائندگی کرتا ہے۔”
انتونیو گوتریس نے اس موقع پر اس خواہش کا اظہار کیا کہ رمضان کا یہ بابرکت عرصہ انسانیت کے لیے بہتری کا پیغام لائے۔ انہوں نے دعا کی کہ یہ مہینہ تمام انسانوں کے لیے ایک پرامن، فیاض اور منصفانہ دنیا کے قیام کا ذریعہ ثابت ہو۔
سیکرٹری جنرل کا یہ بیان ایک ایسے وقت میں سامنے آیا ہے جب دنیا کے کئی حصے تنازعات اور عدم استحکام کا شکار ہیں۔ ان کا یہ پیغام نہ صرف مسلمانوں کے ساتھ یکجہتی کا اظہار ہے بلکہ عالمی سطح پر مذہبی ہم آہنگی اور انسانی حقوق کے احترام کو فروغ دینے کی ایک کوشش بھی ہے۔
