ممبئی/رباط (ویب ڈیسک): معروف اداکارہ اور ڈانسر نورا فتحی ان دنوں اپنی عالمی سیاحت اور فٹ بال کے میدانوں میں موجودگی کی وجہ سے خبروں کی زینت بنی ہوئی ہیں۔ سوشل میڈیا پر گردش کرنے والی حالیہ افواہوں کے مطابق، نورا فتحی اور مراکشی فٹ بال ٹیم کے کپتان اشرف حکیمی کے درمیان قریبی تعلقات استوار ہو چکے ہیں۔
گزشتہ ہفتے کے آخر میں نورا فتحی نے افریقی کپ آف نیشنز (AFCON) کے ایک میچ میں شرکت کی۔
مراکش کی فتح کے بعد انہوں نے انسٹاگرام پر اپنی خوشی کا اظہار کرتے ہوئے ٹیم کو مبارکباد دی، جس کے بعد مداحوں نے قیاس آرائیاں شروع کر دیں کہ وہ کسی خاص کھلاڑی کی حمایت کے لیے اسٹیڈیم میں موجود تھیں۔ انٹرنیٹ پر ہونے والی بحث کے مطابق، وہ ‘پراسرار شخصیت’ کوئی اور نہیں بلکہ اسٹار فٹ بالر اشرف حکیمی ہیں۔
27 سالہ اشرف حکیمی کا شمار دنیا کے بہترین فٹ بالرز میں ہوتا ہے:
وہ فرانسیسی کلب پیرس سینٹ جرمین (PSG) کے لیے کھیلتے ہیں اور مراکش کی قومی ٹیم کے کپتان ہیں۔ وہ 4 نومبر 1998 کو میڈرڈ (اسپین) میں مراکشی والدین کے ہاں پیدا ہوئے۔
انہوں نے اپنے سفر کا آغاز ریال میڈرڈ کی یوتھ اکیڈمی سے کیا اور اب وہ دفاعی پوزیشن (رائٹ بیک) کے ماہر کھلاڑی مانے جاتے ہیں۔
سوشل میڈیا پر نورا کی تصاویر اور ویڈیوز وائرل ہونے کے بعد مداحوں کی بڑی تعداد ان کے تبصروں میں اس مبینہ جوڑی کے بارے میں سوالات کر رہی ہے۔ تاہم، اب تک نہ تو نورا فتحی اور نہ ہی اشرف حکیمی نے ان خبروں کی تردید یا تصدیق کی ہے۔
نورا فتحی، جن کا تعلق خود بھی مراکش سے ہے، ہمیشہ سے اپنی جڑوں سے جڑی رہی ہیں، اور اب اشرف حکیمی کے ساتھ ان کا نام جڑنا شائقین کے لیے بے حد دلچسپی کا باعث بنا ہوا ہے۔
