میساچوسٹس(ویب ڈیسک): امریکی ریاست میساچوسٹس کے شہر کیمبرج میں ایک تاریخی پیش رفت سامنے آئی ہے جہاں پہلی مرتبہ میئر اور ڈپٹی میئر دونوں عہدوں پر پاکستانی نژاد نوجوان منتخب ہوئے ہیں۔
غیر ملکی خبر رساں ادارے کے مطابق 5 جنوری کو ہونے والے بلدیاتی انتخابات میں کراچی سے تعلق رکھنے والی سنبل صدیقی 2027–2026 کی مدت کے لیے تیسری بار کیمبرج سٹی کی میئر منتخب ہو گئیں۔ اسی انتخاب میں پنجاب کے شہر بورے والا سے تعلق رکھنے والے برہان عظیم کیمبرج سٹی کے کم عمر ترین ڈپٹی میئر منتخب ہوئے۔
سنبل صدیقی پیشے کے اعتبار سے وکیل ہیں اور امریکا میں سیاسی میدان میں فعال کردار ادا کر رہی ہیں۔ وہ پہلی مرتبہ 2017 میں کیمبرج سٹی کونسل کی رکن منتخب ہوئیں جبکہ 2020 سے 2024 کے دوران دو بار کیمبرج کی میئر کے فرائض انجام دے چکی ہیں۔
ریاست میساچوسٹس کی تاریخ میں سنبل صدیقی کو یہ اعزاز حاصل ہے کہ وہ کیمبرج کی پہلی مسلمان اور ایشیائی خاتون میئر ہیں جو مسلسل تیسری بار اس منصب پر منتخب ہوئی ہیں۔
دوسری جانب برہان عظیم معروف ماہر تعلیم پروفیسر منیر چوہدری کے صاحبزادے ہیں اور انہوں نے ایم آئی ٹی، بوسٹن سے انجینیئرنگ کی تعلیم حاصل کی ہے۔ وہ اس سے قبل کیمبرج سٹی کے کم عمر ترین کونسلر منتخب ہو چکے ہیں اور دوسری بار کونسلر بننے کے بعد اب کم عمر ترین ڈپٹی میئر بننے کا اعزاز بھی حاصل کر لیا ہے۔
