نیو یارک کے سینٹرل پارک کے قریب دنیا کی سب سے بڑی مینورا نصب

نیویارک کے گرینڈ آرمی پلازہ میں بدھ کے روز ہنوکا کے موقع پر دنیا کی سب سے بڑی مینورا نصب کر دی گئی۔ تقریباً 36 فٹ بلند اور 4,000 پاؤنڈ وزنی یہ مینورا گزشتہ تقریباً 50 برس سے ہر سال ہنوکا کی آٹھوں راتوں میں روشن کی جاتی ہے۔

اس روایتی روشنی کے جشن کا آغاز 1977 میں لوباوِچ یوتھ آرگنائزیشن نے کیا تھا، جس کا مقصد یہودی تہوارِ روشنی کی عوامی سطح پر حوصلہ افزائی کرنا تھا۔ اصل مینورا کو 1980 کی دہائی میں تبدیل کر کے وہ ڈیزائن نصب کیا گیا جو آج نیویارک میں دیکھا جاتا ہے۔ گنیز ورلڈ ریکارڈز نے 2006 میں اسے دنیا کی سب سے بڑی مینورا قرار دیا تھا۔

یہ اونچائی یہودی قانون کے مطابق زیادہ سے زیادہ حد ہے۔ ہر رات کی تقریب میں روایتی موسیقی، ہنوکا کے خصوصی کھانے اور مختلف سرگرمیاں شامل ہوتی ہیں۔

نیویارک، اسرائیل کے بعد دنیا کی سب سے بڑی یہودی آبادی کا مرکز ہے۔ یہ مینورا 14 دسمبر سے 21 دسمبر تک ہر رات روشن کی جائے گی۔