ہیوسٹن، ٹیکساس: پاکستان کی طویل عرصے سے زیرِ انتظار فلم “نیلوفر” کو امریکہ کے شہر ہیوسٹن میں شائقین کے بھرپور جوش و خروش کے درمیان پیش کیا گیا۔ فلم کے مرکزی کرداروں، ماہرہ خان اور فواد خان، کی ایک بار پھر سلور سکرین پر واپسی نے مقامی پاکستانی کمیونٹی اور فلم بینوں کو سینما گھروں کی طرف کھینچ لیا۔
ہیوسٹن کے مقامی سینما میں منعقد ہونے والے پریمیئر میں بڑی تعداد میں افراد نے شرکت کی۔ فلم کے دل کو چھو لینے والے ٹریلر اور اس کے موضوع کے باعث شائقین میں پہلے ہی بے چینی پائی جا رہی تھی۔ ماہرہ خان کی جانب سے بصارت سے محروم لڑکی کا کردار نبھانے اور فواد خان کے ایک ناول نگار کے کردار نے فلم کو ایک منفرد رومانوی کہانی کا رنگ دیا ہے۔
فلم “نیلوفر” کے مصنف اور ہدایتکار عمار رسول ہیں، جبکہ اسے فواد خان نے دیگر پروڈیوسرز کے ساتھ مل کر پروڈیوس کیا ہے۔ یہ فلم رشتوں، محبت اور اندرونی دنیا کی کہانی بیان کرتی ہے، جس میں ایک بینائی سے محروم لڑکی اور ایک ناول نگار کے درمیان پیدا ہونے والا حساس تعلق دکھایا گیا ہے۔
پاکستان میں لاہور کے بعد ہیوسٹن جیسے اہم بین الاقوامی مقام پر فلم کی نمائش پاکستانی سینما کی عالمی سطح پر بڑھتی ہوئی مقبولیت کا ثبوت ہے۔
فلم کی کہانی، بہترین سینماٹوگرافی اور جذباتی اداکاری نے پہلے روز ہی شائقین سے مثبت ردعمل حاصل کیا ہے۔ امید کی جا رہی ہے کہ “نیلوفر” باکس آفس پر کامیابی کے جھنڈے گاڑے گی اور پاکستانی فلم انڈسٹری کو مزید تقویت دے گی۔
