جدہ: جدہ میں 4دسمبر سے شروع ہونےوالی ریڈ سی فلم فیسٹیول میں پاکستان پہلی بار شرکت کرنے جا رہا ہے اس پیش رفت کا سعودی عرب میں مقیم پاکستانی کمیونٹی نے نہایت جوش وخروش سے خیرمقدم کیا ہے۔
پاکستان کےبوتھ میں پاکستانی فلمی، ٹیلی ویژن کے فنکار بھی موجود ہونگے۔
ریڈ سی فلم فیسٹول گزشتہ پانچ سال سے منعقد ہورہاہے جس میں تمام ممالک بھرپور شرکت کرتے ہیں پاکستان اس فیسٹول میں نوشین وسیم کی کاوشوں سے شامل ہوا ہے اس حوالےسے ایونٹ مینجمنٹ نوشین وسیم کی کاوشیں قابل تحسین ہیں۔
نوشین وسیم نے پاکستانی بوتھ کی تفصیلات بتاتے ہوئے کہا کہ انہوں نے بوتھ کے حصول کیلئے ایک سعودی کمپنی کا تعاون حاصل کیا ہے، جس میں مقامی پاکستانی کمیونٹی نے بھرپور معاونت کی ہےاس فیسٹول میں شرکاء عام طور پر اپنے ملکوں کو عالمی سطح پر متعارف کروانے کے لیے اپنے اخراجات خود برداشت کرتے ہیں۔
فیسٹول میں ستر سے زائد ممالک کے ہزاروں لوگ شرکت کرینگے فیسٹول میں ایک سو سے زائد فلمیں دکھائی جائینگی
محترمہ وسیم نے جدہ کے فعال انسان دوست اور پاکستانی کاروباری رہنماؤں کے تعاون سے تین معروف پاکستانی فنکاروں عتیقہ اوڈھو، تقی حیدر، اور شہزاد نواز کی شرکت کو یقینی بنایا ہے۔
وقت کی کمی کے باعث کوئی پاکستانی فلم رجسٹر نہیں ہوسکی مگر اسکے امکانات آئند سال کیلئے بڑھ گئے ہیں،فلم فیسٹول سے قبل ہی ایک ترکی فلم کمپنی نے پاکستانی سعودی فنکاروں پر مشتمل ایک فلم بنانے کے اپنے منصوبے کا اعلان کیاہے۔
یہ فلم سعودی بہن بھائیوں کی اس متاثر کن کہانی پر مرکوز ہوگی جنہوں نے کینسر کا بہادری سے سامنا کیا، جس کا مقصد دونوں ممالک کے درمیان ثقافتی تعلقات کو مزید مضبوط بنانا ہے۔
نوشین وسیم نے ایک پریس کانفرنس سے خطاب کرتے ہوئے پاکستانی پوویلین کی کامیابی کو یقینی بنانے میں مقامی پاکستانی کمیونٹی اور کاروباری اداروں کے اہم کردار کو سراہا۔ مستقبل کی شرکت اور ثقافتی فروغ کے لیے کمیونٹی کا تعاون نہایت اہم ہے۔
واضح رہے کہ یہ شمولیت ولی عہد شہزادہ محمد بن سلمان کے وژن 2030 کے عین مطابق ہے، جو مختلف تارکین وطن آبادی کے لیے خاندانی تفریح اور ثقافتی مشغولیت کو وسعت دینے پر زور دیتا ہے۔
