تہران(ویب ڈیسک): ایران نے اعلان کیا ہے کہ وہ 2026 فیفا ورلڈ کپ کے جمعے کو ہونے والے ڈرا میں شرکت کا بائیکاٹ کر سکتا ہے، کیونکہ امریکہ نے ان کے وفد کے لیے ویزوں کی محدود تعداد جاری کی ہے۔
تہران ٹائمز کے مطابق امریکا نے ایران کے وفد کے لیے صرف چار ویزے جاری کیے ہیں، جن میں ملک کی فٹبال فیڈریشن کے صدر مہدی تاج کا ویزا شامل نہیں ہے۔
تاج نے بتایا کہ انہوں نے اس معاملے پر فیفا کے صدر جیانی انفانٹینو سے گفتگو کی ہے۔
تاج نے ایرانی ٹیلی ویژن کو دیے گئے انٹرویو میں کہا:”ہم اپنے اختیارات کا جائزہ لے رہے ہیں، اور فیصلہ وقت اور حالات کے مطابق کریں گے۔”
انہوں نے مزید کہا:”ہم ایرانی وزارتِ خارجہ اور دیگر حکام سے مسلسل رابطے میں ہیں، اور مناسب وقت پر ضروری فیصلہ کریں گے۔ فی الحال فیڈریشن کی ایگزیکٹو کمیٹی کا موقف ہے کہ جب تک تمام ویزے جاری نہیں کیے جاتے، کوئی بھی وفد امریکا نہیں جائے گا۔”
2026 ورلڈ کپ کی میزبانی امریکا، کینیڈا اور میکسیکو مشترکہ طور پر کر رہے ہیں، جبکہ امریکا میں ایرانی شہریوں پر سخت ویزا پابندیاں برسوں سے نافذ ہیں۔
جون میں امریکی صدر ڈونلڈ ٹرمپ نے ایک نیا ایگزیکٹو آرڈر جاری کیا تھا جس کے تحت 12 ممالک کے شہریوں پر امریکا میں داخلے پر پابندی عائد کی گئی، جس کی وجہ قومی سلامتی کے خدشات بتائے گئے تھے۔
اگرچہ اصولی طور پر اس پابندی سے ورلڈ کپ اور 2028 اولمپکس کے لیے سفر کرنے والے کھلاڑیوں اور کوچنگ اسٹاف کو استثنیٰ حاصل ہونا چاہیے، لیکن ایران کا کہنا ہے کہ اس معاملے میں سیاست شامل ہو گئی ہے۔
تاج نے کہا:”ہمارے نزدیک یہ معاملہ سیاسی بنا دیا گیا ہے۔ ہم نے فیفا کے صدر انفانٹینو کو آگاہ کیا کہ امریکا نے سیاسی مؤقف اختیار کیا ہے اور صورتحال مکمل طور پر سیاسی ہو چکی ہے۔ فیفا کو اس طرح کے طرز عمل کے خلاف مؤقف اختیار کرنا چاہیے۔”
