نیویارک (ویب ڈیسک): نیویارک سٹی کے میئر زہران کوامے ممدانی اور نیویارک سٹی پبلک اسکولز (NYCPS) کے چانسلر قمر سیموئلز نے پری اسکول اسپیشل ایجوکیشن کے دائرہ کار کو وسیع کرنے کا ایک بڑا اور تاریخی اعلان کیا ہے۔
اس فیصلے کے تحت پہلی بار نیویارک سٹی کے عالمی سطح پر تسلیم شدہ خصوصی پروگرامز (Nest, Horizon, AIMS, Path اور ACES) کو پری-کے (Pre-K) کلاس رومز تک بڑھایا جا رہا ہے۔
مالیاتی سال 2027 کے ایگزیکٹو بجٹ سے 67.5 ملین ڈالر کی خطیر رقم اس منصوبے کے لیے مختص کی گئی ہے۔ اس فنڈنگ کی بدولت رواں سال موسمِ خزاں (Fall 2026) سے نیویارک کے تمام پانچوں اضلاع (Boroughs) کے 14 اسکول اضلاع میں یہ خصوصی پروگرام شروع کیے جائیں گے، تاکہ معذور بچوں کو ان کی اپنی مقامی کمیونٹیز میں اعلیٰ معیار کی تعلیم مل سکے۔
اس موقع پر گفتگو کرتے ہوئے میئر زہران ممدانی کا کہنا تھا “معذور بچوں کو وہ تعلیم حاصل کرنے کے لیے پورے شہر کا طویل سفر کرنے پر مجبور نہیں کیا جانا چاہیے جس کے وہ حقدار ہیں۔ یہی وجہ ہے کہ ہم ان کلاس رومز کو ان کے گھروں کے قریب لا رہے ہیں تاکہ پری-کے تعلیم کو صحیح معنوں میں سب کے لیے یکساں بنایا جا سکے۔ ہر بچے کو اپنی کمیونٹی میں سیکھنے اور آگے بڑھنے کا حق حاصل ہے۔”
اسکولز چانسلر قمر سیموئلز نے کہا “ہر بچے کو اپنی ضروریات کے مطابق تیار کردہ کلاس روم میں سیکھنے کا موقع ملنا چاہیے اور یہ آغاز جتنا جلدی ہو اتنا ہی بہتر ہے۔ پہلی بار ہم آٹزم اور دیگر معذوریوں کا شکار بچوں کو وہی اعلیٰ معیار کی خصوصی تعلیم فراہم کر رہے ہیں جس نے ہمارے بڑے طلبہ کے لیے بہترین نتائج فراہم کیے ہیں۔”
اس سرمایہ کاری کے ذریعے مائینڈ سیٹ اور اسکول سسٹم کو مزید مضبوط بنایا جائے گا تاکہ بچوں کو بروقت امداد مل سکے۔ اس سلسلے میں نیویارک پبلک اسکولز سینکڑوں نئے عملے کو بھرتی کرے گا تاکہ معائنے (Evaluation) کے لیے انتظار کا وقت کم کیا جا سکے۔
10 نئے پری اسکول ریجنل اسیسمنٹ سینٹرز (PRACs) قائم کیے جائیں گے جہاں 35 نئے ماہرینِ نفسیات، سوشل ورکرز اور اسپیچ تھیراپسٹ تعینات ہوں گے۔
اسپیشل ایجوکیشن اٹی نيرنٹ ٹیچر (SEIT) پروگرام کے تحت اسپیشل ایجوکیشن کے اساتذہ کو عام پری اسکول کلاس رومز میں بھیجا جائے گا تاکہ معذور بچے بھی اپنے دیگر ساتھیوں کے ساتھ مل کر سیکھ سکیں۔
یہ پروگرام مین ہٹن، برونکس، بروکلین اور کوئنز سمیت تمام پانچوں اضلاع کے نامزد اسکولوں میں باقاعدہ لاگو کیا جا رہا ہے جس کا خیرمقدم مقامی کونسل ممبران اور معذور افراد کے حقوق کے لیے کام کرنے والی تنظیموں نے بھی کیا ہے۔