نیویارک (ویب ڈیسک): نیویارک سٹی کے میئر زہران ممدانی نے رواں سال کے “سمر یوتھ ایمپلائمنٹ پروگرام” (SYEP) کا باقاعدہ افتتاح کر دیا ہے، جس کے تحت نیویارک کے پانچوں اضلاع (Boroughs) سے تعلق رکھنے والے 1 لاکھ نوجوان مختلف کام کی جگہوں پر اپنے پیشہ ورانہ سفر کا آغاز کر رہے ہیں۔
یہ پروگرام مقامی تنظیموں، چھوٹے کاروباروں، ہسپتالوں، ثقافتی اداروں اور سرکاری ایجنسیوں کے تعاون سے نوجوانوں کو تنخواہ کے ساتھ کام کا تجربہ فراہم کرتا ہے۔
افتتاحی تقریب سے خطاب کرتے ہوئے میئر زہران ممدانی کا کہنا تھا:”بہت سے نوجوان نیویارکرز کے لیے گرمیوں کی یہ ملازمت محض وقت گزارنے کا ذریعہ نہیں بلکہ ان کے مستقبل کی طرف ایک مضبوط قدم ہے۔ برسوں سے یہ پروگرام ہزاروں نوجوانوں کو ان کے کیریئر کے آغاز، پیشہ ورانہ مہارتوں کو نکھارنے اور اپنے محلوں کی خدمت کا موقع فراہم کر رہا ہے، جبکہ وہ اس دوران معقول آمدنی بھی کما رہے ہیں۔”
ہیلتھ اینڈ ہیومن سروسز کی ڈپٹی میئر ڈاکٹر ہیلن آرٹیگا اور ڈیپارٹمنٹ آف یوتھ اینڈ کمیونٹی ڈیولپمنٹ (DYCD) کی کمشنر سینڈرا ایسکامیلا ڈیوس نے اس بات پر زور دیا کہ یہ پروگرام نوجوانوں کو صرف کام کا تجربہ ہی نہیں دیتا بلکہ مالیاتی خواندگی (Financial Literacy) جیسی اہم مہارتیں بھی سکھاتا ہے
یہ پروگرام بالخصوص ان نوجوانوں کے لیے ڈیزائن کیا گیا ہے جنہیں عام طور پر مشکلات کا سامنا رہتا ہے، جیسے کہ نائچا (NYCHA) ہاؤسنگ کے رہائشی، بے گھر نوجوان، معذور افراد، اور گن وائلنس (اسلحے کے تشدد) کے خطرے سے دوچار کمیونٹیز۔
تحقیقاتی رپورٹس کے مطابق، اس پروگرام کے شاندار نتائج سامنے آئے ہیں جن میں اسکولوں میں حاضری کا بہتر ہونا، قید کی شرح میں کمی اور نوجوانوں کا محفوظ رہنا شامل ہے۔ ایک حالیہ مطالعے کے مطابق، اس پروگرام میں شمولیت سے نوجوانوں کے گرفتار ہونے کے امکانات میں 17 فیصد اور سنگین جرائم (Felony) میں گرفتاری کے امکانات میں 23 فیصد تک کمی دیکھی گئی ہے۔
یہ پروگرام جولائی سے اگست تک 6 ہفتوں کے لیے جاری رہے گا۔ اس سال نوجوانوں کی سہولت کے لیے معروف کمپنی ‘لفٹ’ (Lyft) کی جانب سے پروگرام کے شرکاء کو 1,200 مفت دو ماہ کی ‘سٹی بائیک’ (Citi Bike) ممبرشپ بھی دی جا رہی ہے تاکہ وہ آسانی سے اپنی ملازمت کے مقامات پر آ جا سکیں اور شہر کو ایکسپلور کر سکیں۔