منیلا: طوفان فنگ وونگ (Fung-Wong)جسے مقامی طور پر اُوان (Uwan)کہا جا رہا ہے ایک ہفتے کے اندر فلپائن کو متاثر کرنے والا دوسرا طاقتور سمندری طوفان بن گیا ہے۔
یہ طوفان اتوار کی شام ملک کے ساحلی علاقوں سے ٹکرایا، جس کے بعد پورے ملک میں انتہائی بارشوں، تباہ کن ہواؤں اور خطرناک سمندری طغیانی کی وارننگ جاری کی گئی ہے۔
قومی موسمیاتی ادارے کے مطابق، اتوار کے روز طوفان کی مسلسل رفتار 185 کلومیٹر فی گھنٹہ (115 میل فی گھنٹہ)جبکہ جھکڑوں کی رفتار 225 کلومیٹر فی گھنٹہ (140 میل فی گھنٹہ)تک ریکارڈ کی گئی۔
محکمۂ موسمیات کے مطابق، فنگ وونگ کے گزرنے تک لوزون (Luzon)جزیرے پر جو ملک کا سب سے زیادہ آبادی والا علاقہ ہے200 ملی میٹر سے زائد بارش ہونے کا امکان ہے۔
یہ طوفان گزشتہ ہفتے آنے والے ٹائفون کالمیگی (Kalmaegi) کے فوراً بعد آیا ہے، جس نے کم از کم 224 افراد کی جان لی اور 100 سے زائد لاپتہ ہیں۔ فنگ وونگ کے باعث ریسکیو آپریشنز عارضی طور پر معطل** کر دیے گئے ہیں۔
فلپائن کے شمالی حصے کو عبور کرنے کے بعد، طوفان منگل تک جنوبی بحیرہ چین (South China Sea)کی جانب بڑھے گا، اور پھر شمال کی طرف تائیوان (Taiwan) کا رخ کرے گا۔ ماہرین کا کہنا ہے کہ تائیوان کو ہفتے کے وسط میں شدید بارشوں، تیز ہواؤں اور ممکنہ سیلاب کا سامنا کرنا پڑ سکتا ہے۔
دوسری جانب، جنوب مغربی یورپ کے کچھ حصوں میں، خصوصاً اسپین اور پرتگال میں، اس ہفتے کے آخر تک 100 سے 200 ملی میٹر تک بارش ہونے کی پیشگوئی کی گئی ہے۔ منگل کو ہواؤں کی رفتار 60 میل فی گھنٹہ تک پہنچنے کا امکان ہے۔
ادھر امریکہ کے جنوب مشرقی حصےمیں سردی کی پہلی شدید لہر آنے والی ہے۔ شمالی فلوریڈا میں درجہ حرارت رواں موسم کی اوسط سے30 فارن ہائیٹ (تقریباً 15 ڈگری سینٹی گریڈ)تک نیچے گرنے کی توقع ہے۔
ہفتے کے آخر میں جہاں درجہ حرارت 30 ڈگری سینٹی گریڈ تک پہنچا، وہیں منگل کی صبح 0 ڈگری سینٹی گریڈ تک گرنے سے شہریوں کو سخت حیرت ہوگی۔
دلچسپ مگر غیر معمولی بات یہ ہے کہ اس شدید سردی کے باعث فلوریڈا میں اگوآنا (Iguanas)درختوں سے گرنے لگیں گے۔ چونکہ یہ سرد خون والے رینگنے والے جانورہیں، اس لیے درجہ حرارت 10 ڈگری سے نیچے جانے پر ان کے عضلات مفلوج ہو جاتے ہیں اور وہ گر جاتے ہیں۔ حکام نے منگل کی صبح کے لیے خصوصی انتباہ جاری کیا ہے کہ لوگ درختوں یا چھتوں سے گرنے والے اگوآناسے محتاط رہیں۔
