فلوریڈا / واشنگٹن(ویب ڈیسک): اپنی سستی ترین پروازوں اور مخصوص پیلے رنگ کے جہازوں کے لیے مشہور امریکی فضائی کمپنی ‘اسپیریٹ ایئرلائنز’ نے باقاعدہ طور پر دیوالیہ ہونے اور کاروبار بند کرنے کا اعلان کر دیا ہے۔
کمپنی کی جانب سے جاری کردہ بیان کے مطابق، تمام پروازیں منسوخ کر دی گئی ہیں اور کسٹمر سروس بھی فوری طور پر ختم کر دی گئی ہے۔
انتظامیہ کا کہنا ہے کہ وہ گزشتہ 34 سالوں سے ‘الٹرا لو کاسٹ’ ماڈل کے ذریعے مسافروں کو سستی سفری سہولیات فراہم کرنے پر فخر محسوس کرتے ہیں، تاہم بڑھتے ہوئے اخراجات اور قرضوں کے بوجھ کی وجہ سے اب آپریشنز جاری رکھنا ممکن نہیں رہا۔ 2020 سے اب تک کمپنی کو 2.5 ارب ڈالر سے زائد کا نقصان ہو چکا تھا۔
ٹرمپ انتظامیہ نے کمپنی کو بچانے کے لیے حکومتی ‘بیل آؤٹ’ پیکج پر غور کیا تھا، لیکن کوئی حتمی معاہدہ طے نہ پا سکا۔
امریکی وزیرِ ٹرانسپورٹ شان ڈفی کے مطابق، متاثرہ مسافروں کو دیگر ایئرلائنز پر رعایتی نرخوں کی پیشکش کی جائے گی، جبکہ 17,000 ملازمین کے مستقبل کے حوالے سے بھی اقدامات کیے جا رہے ہیں۔ ایران جنگ کے باعث ایندھن کی بڑھتی ہوئی قیمتوں کو کمپنی کی تباہی کی آخری وجہ قرار دیا جا رہا ہے۔