دبئی(ویب ڈیسک): دبئی میونسپلٹی نے شہر کے عوامی پارکس کو جدید دفتری ضروریات کے مطابق ڈھالنے کے لیے ایک منفرد “ورک فرام پارک” اقدام کا اعلان کیا ہے۔ اس منصوبے کا مقصد روایتی دفتری ماحول سے ہٹ کر فطرت کے قریب، ٹیکنالوجی سے لیس اور پائیدار کام کرنے کی جگہیں (Workspaces) فراہم کرنا ہے جو پیداواری صلاحیت اور تفریح کو یکجا کر دیں۔
اس اقدام کے تحت پہلا فلیگ شپ سینٹر مئی 2026 میں البرشاء پونڈ پارک (Al Barsha Pond Park) میں کھولا جائے گا۔ یہ ورک اسپیس “ماڈیولر کنسٹرکشن” ٹیکنالوجی کے ذریعے تیار کی جائے گی، جو ماحول دوست ہونے کے ساتھ ساتھ لچکدار بھی ہے۔ اس منصوبے کے ذریعے فری لانسرز، کاروباری افراد (Entrepreneurs)، اور چھوٹے و درمیانے درجے کے اداروں (SMEs) کو ایک ایسا پلیٹ فارم ملے گا جہاں وہ ہاٹ ڈیسک، ایونٹ اسپیس، اور خاص طور پر پوڈ کاسٹ اسٹوڈیوز جیسی سہولیات سے فائدہ اٹھا سکیں گے۔
دبئی میونسپلٹی نے اس منصوبے کے لیے ‘گروپ امانہ’ (Group AMANA) اور ‘لیٹس ورک’ (Letswork) کے ساتھ تعاون کے معاہدوں پر دستخط کیے ہیں۔ لیٹس ورک کے پلیٹ فارم کے ذریعے صارفین ان جگہوں تک رسائی حاصل کر سکیں گے، جبکہ تخلیقی مواد تیار کرنے والوں (Content Creators) کے لیے خصوصی ‘کریٹو اسپیسز’ بھی بنائی جائیں گی۔
یہ اقدام دبئی کے 2040 کے ماسٹر پلان اور معاشی ایجنڈے D33 کا حصہ ہے، جس کا مقصد دبئی کو دنیا میں رہنے اور کام کرنے کے لیے بہترین شہر بنانا اور پائیدار شہری انفراسٹرکچر کو فروغ دینا ہے۔
