تحریر: شمائلہ
اسلام آباد: پاکستان سے حج فلائٹ آپریشن کا باقاعدہ آغاز آج 18 اپریل سے ہو گیا ہے۔ وزارت مذہبی امور کے مطابق، پہلی پروازیں کراچی، لاہور، سیالکوٹ اور ملتان سے روانہ ہو رہی ہیں، جو کہ 34 روزہ طویل آپریشن کا حصہ ہیں۔
اس سال مجموعی طور پر 468 پروازوں کے ذریعے 1 لاکھ 19 ہزار عازمینِ حج کو مدینہ منورہ اور مکہ مکرمہ پہنچایا جائے گا۔ سرکاری اسکیم کے تحت روانہ ہونے والے عازمین میں 67,230 مرد اور 51,846 خواتین شامل ہیں۔
دو مرحلوں پر مشتمل شیڈول:
پہلا مرحلہ: ابتدائی 15 روز تک تمام پروازیں براہِ راست مدینہ منورہ اتریں گی۔ اس مرحلے کے لیے 186 پروازیں مختص کی گئی ہیں۔
دوسرا مرحلہ: 4 مئی سے پروازوں کا رخ جدہ کی جانب موڑ دیا جائے گا تاکہ عازمین براہِ راست مکہ مکرمہ پہنچ سکیں۔ اس مرحلے کے لیے 282 پروازیں شیڈول ہیں۔
سب سے زیادہ پروازیں اسلام آباد سے روانہ ہوں گی جن کی تعداد 129 ہے، اس کے بعد کراچی سے 124 اور لاہور سے 104 پروازیں اڑان بھریں گی۔ دیگر شہروں میں کوئٹہ (18)، ملتان (34)، سیالکوٹ (26)، فیصل آباد (23) اور سکھر (5) شامل ہیں۔
حج آپریشن کو کامیاب بنانے کے لیے پی آئی اے، ایئر بلیو، ایئر سیال اور سعودی ایئر لائنز مل کر کام کر رہی ہیں۔ آخری حج پرواز 21 مئی کو پاکستان سے روانہ ہوگی، جس کے ساتھ ہی روانگی کا یہ عمل مکمل ہو جائے گا۔