نیویارک: میئر زوہران ممدانی اور سٹی کونسل کی سپیکر جولی مینن نے مالی سال 2027 کے لیے نیویارک سٹی کے اربوں ڈالر کے بجٹ خسارے کو پورا کرنے کے لیے ریاست (البانی) سے مدد کا مطالبہ کر دیا ہے۔
سٹی ہال میں ایک مشترکہ پریس کانفرنس کے دوران دونوں رہنماؤں نے زور دیا کہ ریاست نیویارک اپنے بجٹ میں شہر کو اس کا جائز حصہ فراہم کرے۔
میئر اور سپیکر نے تجویز دی کہ “پاس تھرو اینٹیٹی ٹیکس” (PTET) کریڈٹ کو 75 فیصد تک کم کیا جائے، جس سے شہر کو تقریباً 1 ارب ڈالر کی اضافی آمدنی حاصل ہوگی۔
ان کا کہنا تھا کہ یہ ٹیکس فی الوقت امیر ترین طبقے کے لیے کٹوتی کا کام کر رہا ہے، اور اس میں تبدیلی سے شہر کی مالی حالت مستحکم ہوگی۔
مزید برآں، دونوں رہنماؤں نے پنشن فنڈز کی ری اسٹرکچرنگ اور کلاس رومز میں طلبہ کی تعداد سے متعلق مینڈیٹ میں نرمی کی حمایت کی، جس سے مزید 1 ارب ڈالر کی بچت متوقع ہے۔
میئر ممدانی نے واضح کیا کہ نیویارک سٹی ریاست کی مجموعی آمدنی میں 55.6 فیصد حصہ ڈالتا ہے لیکن واپسی میں اسے صرف 41.7 فیصد ملتا ہے۔ انہوں نے البانی پر زور دیا کہ وہ شہر پر مالی بوجھ ڈالنے کی دہائیوں پرانی پالیسی ختم کرے اور منصفانہ مالیاتی شراکت داری قائم کرے۔