بیجنگ: چین کی معروف ٹیکنالوجی کمپنی کوائیشو (Kuaishou Technology) نے اعلان کیا ہے کہ علی بابا اور ٹین سینٹ سمیت سرمایہ کاروں کے ایک بڑے گروپ نے اس کے آرٹیفیشل انٹیلیجنس (AI) ویڈیو جنریشن یونٹ، کلنگ اے آئی (Kling AI) میں 19 ارب یوآن (تقریباً 2.8 ارب ڈالر) سے زائد کی سرمایہ کاری کا فیصلہ کیا ہے۔ اس نئی فنڈنگ سے قبل ہی کلنگ اے آئی کی مارکیٹ ویلیو تقریباً 15 ارب ڈالر لگائی گئی ہے۔
یہ خطیر سرمایہ کاری چین کے تیزی سے پھیلتے ہوئے اے آئی (AI) سیکٹر پر سرمایہ کاروں کے مضبوط اعتماد کو ظاہر کرتی ہے، جو وسیع تر اقتصادی چیلنجز کے باوجود مسلسل بڑے پیمانے پر سرمایہ اپنی طرف راغب کر رہا ہے۔
کوائیشو کے مطابق، فنڈنگ کے اس راؤنڈ کے تحت کلنگ اے آئی اگلے دو ماہ کے دوران ایک اور سرمایہ کار کو بھی شامل کر سکتی ہے، جس کے بعد کل فنڈنگ کی حد 20.45 ارب یوآن تک پہنچ جائے گی۔ اس نئی سرمایہ کاری کے نتیجے میں کلنگ اے آئی میں کوائیشو کا ملکیتی حصہ 100 فیصد سے کم ہو کر تقریباً 68 فیصد رہ جائے گا۔ علی بابا اور ٹین سینٹ کے علاوہ چین کی ایک اور بڑی ٹیک کمپنی بائیڈو (Baidu) نے بھی کلنگ اے آئی میں حصص خریدنے پر رضامندی ظاہر کی ہے۔
کلنگ اے آئی نے مارچ کی سہ ماہی کے دوران 650 ملین یوآن کی آمدنی حاصل کی، جو گزشتہ سال اسی مدت کے مقابلے میں چار گنا سے بھی زیادہ ہے۔ یہ اضافہ مارکیٹ میں اے آئی سے لیس کنٹینٹ تخلیق کرنے والے ٹولز کی بڑھتی ہوئی مانگ کا منہ بولتا ثبوت ہے۔
سٹی بینک (Citi) کے تجزیہ کاروں کا کہنا ہے کہ کمپنی کی 15 ارب ڈالر کی پری منی ویلیو ایشن توقعات کے عین مطابق ہے، تاہم سرمایہ کاروں کی لائن اپ انتہائی “شاندار” ہے۔ اب مارکیٹ کی تمام تر توجہ کلنگ اے آئی کے اگلے بڑے پروڈکٹ اپ گریڈ پر ہوگی۔ اس ڈیل کی خبر سامنے آنے کے بعد جمعہ کے روز ابتدائی ٹریڈنگ میں کوائیشو کے شیئرز میں 6.9 فیصد تک اضافہ دیکھا گیا۔