لندن(ویب ڈیسک): برطانوی وزیراعظم کیر اسٹارمر نے لندن کے مشہورِ زمانہ ٹریفلگر اسکوائر میں مسلمانوں کی جانب سے رمضان کی تقریبات منانے کا بھرپور دفاع کیا ہے۔ انہوں نے اسلامو فوبیا اور نسل پرستانہ تنقید کو مسترد کرتے ہوئے واضح کیا کہ عوامی مقامات پر مذہبی تقریبات کا انعقاد برطانوی طرزِ زندگی کا حصہ ہے۔
وزیراعظم اسٹارمر نے اپنے بیان میں کہا کہ جس طرح ہندو، سکھ، عیسائی، یہودی اور دیگر مذاہب کے پیروکار بغیر کسی تنازع کے برطانوی عوامی زندگی میں اپنی مذہبی تقریبات اور تہوار مناتے ہیں، مسلمانوں کے لیے رمضان کی تقریبات بھی اس سے مختلف نہیں ہیں۔ انہوں نے زور دیا کہ برطانیہ ایک کثیر الثقافتی معاشرہ ہے جہاں ہر شہری کو اپنے عقیدے کے مطابق جینے کا برابر حق حاصل ہے۔
یہ ریمارکس ان اسلامو فوبک اور نسل پرستانہ حلقوں کی جانب سے کی جانے والی تنقید کے جواب میں سامنے آئے ہیں جنہوں نے ٹریفلگر اسکوائر میں رمضان کی تقریبات کی مخالفت کی تھی۔ وزیراعظم نے ان منفی آوازوں کو مسترد کرتے ہوئے کہا کہ برطانوی معاشرے کی خوبصورتی اس کے تنوع میں ہے اور کسی بھی ایک کمیونٹی کو نشانہ بنانا برطانوی اقدار کے منافی ہے۔
یاد رہے کہ ٹریفلگر اسکوائر میں منعقد ہونے والی افطار اور رمضان کی دیگر تقریبات میں بڑی تعداد میں نہ صرف مسلمان بلکہ دیگر کمیونٹیز کے لوگ بھی شرکت کرتے ہیں، جو بین المذاہب ہم آہنگی کی ایک بہترین مثال بن کر ابھری ہیں۔ وزیراعظم کے اس بیان کو برطانوی مسلم کمیونٹی کی جانب سے بڑے پیمانے پر سراہا جا رہا ہے۔
