تاریخ : 5 جون
نیویارک / اسلام آباد (ویب ڈیسک): اقوامِ متحدہ کی جنرل اسمبلی کے حالیہ اجلاس میں سلامتی کونسل کی سالانہ رپورٹ کی پیشکش کے دوران پاکستان اور بھارت کے مابین شدید سفارتی نوک جھونک دیکھنے میں آئی۔ پاکستان مشن کے پولیٹیکل کوآرڈینیٹر اور کونسلر گل قیصر سروانی نے بھارتی نمائندے کے الزامات کا کرارا جواب دیتے ہوئے نئی دہلی کے جارحانہ عزائم اور عالمی قوانین کی خلاف ورزیوں کو بے نقاب کر دیا۔
کونسلر گل قیصر سروانی نے جنرل اسمبلی سے خطاب کرتے ہوئے واضح کیا کہ بھارت جموں و کشمیر پر سلامتی کونسل کی منظور شدہ قراردادوں پر عمل درآمد سے مسلسل انکار کر رہا ہے۔ انہوں نے یاد دلایا کہ یہ روش اقوامِ متحدہ کے چارٹر کے آرٹیکل 25 کی کھلی خلاف ورزی ہے، جو تمام رکن ممالک کو سلامتی کونسل کے فیصلوں کو تسلیم کرنے اور ان پر عمل کرنے کا پابند بناتا ہے۔ انہوں نے کہا کہ کشمیر پر اپنے وعدوں سے مکر کر بھارت خود کو ایک غیر ذمہ دار ریاست ثابت کر رہا ہے۔
پاکستانی مندوب نے سخت موقف اختیار کرتے ہوئے کہا کہ پاکستان پر الزامات تراشی کر کے بھارت اپنے سنگین ریکارڈ کو دنیا کی نظروں سے اوجھل نہیں کر سکتا۔ گل قیصر سروانی نے عالمی برادری کے سامنے بھارت کا کچا چٹھا کھولتے ہوئے کہا کہ نئی دہلی پاکستان میں دہشت گردی کی سرپرستی، غیر قانونی طور پر زیرِ قبضہ جموں و کشمیر (IIOJK) میں ریاستی دہشت گردی، اور اقلیتوں کے خلاف تشدد کو ہوا دینے میں ملوث ہے۔
انہوں نے مزید کہا کہ کینیڈا، امریکہ اور دیگر غیر ملکی سرزمینوں پر بھارت کی جانب سے کروائی جانے والی ریاست کی پشت پناہی میں ٹارگٹ کلنگ (Assassination Campaigns) کی مہمات اب دنیا کے سامنے آ چکی ہیں، جو بین الاقوامی قوانین کے لیے ایک سنگین خطرہ بن چکی ہیں۔
پاکستانی مشن کے پولیٹیکل کوآرڈینیٹر نے علاقائی استحکام کو نقصان پہنچانے کی بھارتی کوششوں پر بات کرتے ہوئے ‘سندھ طاس معاہدے’ (Indus Waters Treaty) کا معاملہ بھی اٹھایا۔ انہوں نے کہا کہ بھارت کی جانب سے اس تاریخی اور قانونی معاہدے کو یکطرفہ طور پر معطل یا التوا میں رکھنے کی غیر قانونی کوششیں بین الاقوامی قانون کی صریح خلاف ورزی ہیں، جس سے خطے میں پانی کا بحران پیدا ہونے کا خدشہ ہے۔ پاکستان نے واضح کیا کہ بھارت علاقائی امن کو داؤ پر لگانے والی سرگرمیوں سے باز رہے۔
