نیویارک: رائس ایکسپورٹرز ایسوسی ایشن آف پاکستان (REAP) کے چیئرمین فیصل جہانگیر کی سربراہی میں ایک اعلیٰ سطحی وفد نے نیویارک کا کامیاب دورہ مکمل کر لیا۔ دورے کے آخری روز وفد نے ہکس وِل، لانگ آئی لینڈ میں ‘اپنا بازار’ کے ویئر ہاؤس کا دورہ کیا، جہاں مالکان مسٹر دیپک اور مسٹر سنگھ نے ان کا استقبال کیا۔
ملاقات میں اپنا بازار کے 30 سے زائد ریٹیل آؤٹ لیٹس پر پاکستانی چاول کی دستیابی بڑھانے اور صرف پاکستانی چاول کے لیے خصوصی ‘پرائیویٹ لیبل’ لانچ کرنے پر تبادلہ خیال کیا گیا۔
بعد ازاں وفد نے امریکہ میں پاکستانی چاول کے بڑے درآمد کنندہ ‘آہو بارہ’ کا دورہ کیا، جہاں ایف ڈی اے (FDA) کلیئرنس اور کیڑے مار ادویات کے باقیات (Pesticide Residue) سے متعلق درپیش چیلنجز پر بات چیت کی گئی۔
وفد نے ایڈیسن، نیو جرسی میں ‘بیسٹ فوڈز’ کے ہیڈ کوارٹر کا بھی دورہ کیا، جہاں سی او او مسٹر راجیش اسرانی نے بتایا کہ ان کا ادارہ پہلے ہی زیبرا رائس سمیت بڑے پاکستانی برانڈز جیسے نیسلے، ٹپال اور شان کے ساتھ کام کر رہا ہے۔
چیئرمین ریپ فیصل جہانگیر نے نیویارک میں پاکستانی قونصل جنرل عامر احمد اتوزئی اور ٹریڈ کونسلر عدنان محمود اعوان کی کاوشوں کو سراہتے ہوئے اس دورے کو پاکستانی برآمدات کے لیے انتہائی سودمند قرار دیا۔
