اسلام آباد / میکسیکو سٹی: فٹ بال کے شائقین کے لیے خوشخبری ہے کہ فیفا ورلڈ کپ 2026 تاریخ کا پہلا ایسا ورلڈ کپ ہوگا جس کی افتتاحی تقریبات تین مختلف میزبان ممالک میں منعقد کی جائیں گی۔ میکسیکو، کینیڈا اور امریکہ میں ہونے والی یہ تقریبات ثقافت، موسیقی اور فن کے رنگ بکھیرتے ہوئے دنیا کو اتحاد اور یکجہتی کا پیغام دیں گی۔
روایتی طور پر ورلڈ کپ کی ایک ہی افتتاحی تقریب منعقد کی جاتی ہے، تاہم اس بار فیفا نے تینوں میزبان ممالک کی ثقافتی شناخت کو اجاگر کرنے کے لیے منفرد انداز اپنایا ہے۔ پاکستانی شائقین تمام تقریبات اور میچز پاکستان کے معیاری وقت (PKT) کے مطابق براہِ راست دیکھ سکیں گے۔
پہلا مرحلہ: میکسیکو سٹی
ورلڈ کپ کا باقاعدہ آغاز میکسیکو سٹی سے ہوگا، جہاں مقامی ثقافت، قدیم روایات اور مشہور ’’پاپیل پیکاڈو‘‘ آرٹ کو افتتاحی تقریب کا حصہ بنایا جائے گا۔
تقریب میں عالمی شہرت یافتہ گلوکارہ شکیرا اور نائجیرین سپر اسٹار برنا بوائے ورلڈ کپ کا آفیشل ساؤنڈ ٹریک “Dai Dai” لائیو پیش کریں گے۔ اس کے علاوہ تائلا، جے بالون، الیجینڈرو فرنانڈیز اور مانا بھی پرفارمنس دیں گے۔
افتتاحی تقریب (پاکستان وقت): 11 جون، رات 10:00 بجے
پہلا میچ: میکسیکو بمقابلہ جنوبی افریقہ — 12 جون، رات 12:00 بجے
دوسرا مرحلہ: ٹورنٹو
دوسری افتتاحی تقریب کینیڈا کے شہر ٹورنٹو میں منعقد ہوگی جس کا موضوع “Cultural Mosaic” رکھا گیا ہے۔ اس تقریب میں کینیڈا کے ثقافتی تنوع کو موسیقی اور رقص کے ذریعے پیش کیا جائے گا۔
تقریب میں مائیکل بوبلے، الیسیا کارا، ایلینا، ایلانس موریسیٹ اور نورا فتیہی اپنی فنکارانہ صلاحیتوں کا مظاہرہ کریں گے۔
افتتاحی تقریب (پاکستان وقت): 12 جون، رات 10:30 بجے
میچ: کینیڈا بمقابلہ بوسنیا اینڈ ہرزیگووینا — 13 جون، رات 12:00 بجے
تیسرا مرحلہ: لاس اینجلس
تیسری اور سب سے بڑی افتتاحی تقریب امریکی شہر لاس اینجلس میں ہوگی، جہاں جدید ویژول ایفیکٹس، ڈیجیٹل اسٹوری ٹیلنگ اور شاندار اسٹیج پروڈکشن شائقین کو مسحور کر دے گی۔
اس تقریب میں کیٹی پیری، فیوچر، انیتا، لیزا (LISA) اور ریما سمیت عالمی موسیقی کی صنعت کے بڑے نام پرفارم کریں گے۔
افتتاحی تقریب (پاکستان وقت): 13 جون، صبح 4:30 بجے
میچ: امریکہ بمقابلہ پیراگوئے — 13 جون، صبح 6:00 بجے
پری میچ سرگرمیاں
فیفا کے مطابق تمام میچز سے تقریباً 25 منٹ قبل کھلاڑیوں کی میدان میں آمد، قومی ترانے اور دیگر رسمی تقریبات کا آغاز کر دیا جائے گا تاکہ شائقین کو مکمل ورلڈ کپ تجربہ فراہم کیا جا سکے۔
واضح رہے کہ فیفا ورلڈ کپ 2026 تاریخ کا سب سے بڑا ورلڈ کپ ہوگا جس میں 48 ٹیمیں اور ریکارڈ 1,248 کھلاڑی حصہ لے رہے ہیں
