جنیوا: عالمی ادارہ صحت (WHO) نے ہنٹا وائرس (Hantavirus) کے ممکنہ عالمی پھیلاؤ کے پیشِ نظر دنیا کے 12 ممالک کے لیے ہنگامی الرٹ جاری کر دیا ہے۔ یہ تشویشناک صورتحال ایک کروز شپ پر وائرس کے پھیلاؤ کے بعد پیدا ہوئی، جہاں سے مسافر علامات ظاہر ہونے سے پہلے ہی مختلف ممالک کی جانب روانہ ہو چکے تھے۔
بین الاقوامی خبر رساں ایجنسی کے مطابق، اب تک وائرس کے 5 تصدیق شدہ کیسز سامنے آ چکے ہیں، جبکہ 8 افراد میں سانس کی شدید بیماری کی علامات پائی گئی ہیں۔
متاثرہ ممالک کی فہرست میں ترکیہ، کینیڈا، جرمنی، برطانیہ اور امریکہ جیسے اہم ممالک شامل ہیں۔ عالمی ادارہ صحت کے سربراہ کا کہنا ہے کہ اگرچہ صورتحال تشویشناک ہے، تاہم بروقت طبی مداخلت اور موثر نگرانی کے ذریعے وائرس کو محدود کیا جا سکتا ہے۔
طبی ماہرین کے مطابق ہنٹا وائرس ایک مہلک بیماری ہے جو بنیادی طور پر چوہوں کے فضلے، پیشاب یا تھوک سے انسانوں میں منتقل ہوتی ہے۔ وائرس کے ذرات ہوا کے ذریعے سانس کے راستے انسانی جسم میں داخل ہو کر پھیپھڑوں کو متاثر کرتے ہیں۔
اس کی ابتدائی علامات میں تیز بخار، پٹھوں میں شدید درد، تھکن، متلی اور سانس لینے میں دشواری شامل ہیں۔ واضح رہے کہ اس وائرس کے لیے فی الوقت کوئی مخصوص ویکسین یا علاج دستیاب نہیں ہے، جس کی وجہ سے احتیاط اور صفائی ستھرائی کو بنیادی بچاؤ قرار دیا جا رہا ہے۔
