نیویارک: نیویارک شہر پیر کی شب کھیلے جانے والے این بی اے فائنلز کے تیسرے میچ کے باعث عالمی توجہ کا مرکز بن گیا ہے۔
میڈیسن اسکوائر گارڈن (MSG) میں ہونے والے اس ہائی پروفائل مقابلے میں امریکی صدر ڈونلڈ ٹرمپ اور نیویارک سٹی کے میئر زہران ممدانی کی متوقع شرکت کے پیش نظر غیر معمولی سیکیورٹی انتظامات کیے گئے ہیں۔
صدر ٹرمپ این بی اے فائنلز کے کسی میچ میں شرکت کرنے والے تاریخ کے صرف دوسرے حاضر سروس امریکی صدر ہوں گے، جس کے باعث سیکیورٹی اداروں کو ہائی الرٹ کر دیا گیا ہے۔
حکام نے میچ دیکھنے آنے والے شائقین کو ہدایت کی ہے کہ وہ میچ کے آغاز سے کم از کم دو گھنٹے قبل اسٹیڈیم پہنچیں تاکہ سیکیورٹی اسکریننگ کا عمل بروقت مکمل کیا جا سکے۔ اس موقع پر ائیرپورٹ طرز کی سخت سیکیورٹی چیکنگ نافذ ہوگی۔
امریکی خفیہ ایجنسی سیکریٹ سروس کی جانب سے جاری ہدایات کے مطابق اسٹیڈیم میں ہر قسم کے بیگز لے جانے پر پابندی ہوگی، جبکہ متعدد دیگر اشیاء بھی ممنوع قرار دی گئی ہیں، جن میں:
سیلفی اسٹکس
شیشے کے برتن
دھاتی یا تھرمل بوتلیں اور کنٹینرز
ہر قسم کا اسلحہ
شامل ہیں۔
واچ پارٹیز کے انعقاد کی تصدیق
سوشل میڈیا پر گردش کرنے والی ان افواہوں کی تردید کر دی گئی ہے جن میں دعویٰ کیا جا رہا تھا کہ سخت سیکیورٹی کے باعث اسٹیڈیم کے باہر واچ پارٹیز منعقد نہیں ہوں گی۔
میئر آفس کے ڈپٹی پریس سیکریٹری کے مطابق واچ پارٹیز ضرور منعقد کی جائیں گی، البتہ ان کے مقامات کا اعلان جلد کیا جائے گا۔
نیویارک پولیس ڈیپارٹمنٹ (NYPD) کے ترجمان نے بھی تصدیق کی ہے کہ شائقین کے لیے خصوصی واچ پارٹیز کا انتظام کیا جا رہا ہے اور اس حوالے سے مزید تفصیلات جلد جاری کی جائیں گی۔
ٹریفک پلان اور سڑکوں کی بندش
صدر ٹرمپ کی آمد کے باعث میڈیسن اسکوائر گارڈن اور پین اسٹیشن کے اطراف متعدد اہم سڑکیں بند رہیں گی۔ حکام نے شہریوں کو متبادل راستے اختیار کرنے اور اضافی سفری وقت رکھنے کی ہدایت کی ہے۔
نیتن یاہو کی شرکت سے متعلق قیاس آرائیاں
دریں اثنا سوشل میڈیا پر اسرائیلی وزیراعظم بینجمن نیتن یاہو کی ممکنہ شرکت کے حوالے سے بھی قیاس آرائیاں جاری ہیں۔ تاہم تاحال اسرائیلی وزیراعظم کے دفتر کی جانب سے اس بارے میں کوئی باضابطہ تصدیق یا تردید سامنے نہیں آئی۔
این بی اے فائنلز کے اس اہم مقابلے کو نہ صرف کھیلوں بلکہ سیاسی اعتبار سے بھی غیر معمولی اہمیت حاصل ہو گئی ہے، جس کے باعث نیویارک میں سیکیورٹی اور انتظامی تیاریوں کو حتمی شکل دی جا رہی ہے۔
