نیویارک: نیویارک کے میئر زوہران کوامے ممدانی نے موسم گرما کی پہلی شدید گرمی کی لہر (Heatwave) کے پیشِ نظر ایک خصوصی ویڈیو پیغام جاری کیا ہے، جس میں نیویارک کے باسیوں پر زور دیا گیا ہے کہ وہ گرمی سے بچنے کے لیے ابھی سے تیاریاں مکمل کریں۔
محکمہ موسمیات کے مطابق رواں ہفتے جمعرات اور جمعہ کو درجہ حرارت اور حبس کی شدت 100 ڈگری فارن ہائیٹ (تقریباً 38 ڈگری سینٹی گریڈ) تک پہنچنے کا امکان ہے، جبکہ جمعہ کو گرج چمک کے ساتھ بارش بھی ہو سکتی ہے۔
میئر ممدانی نے اپنے پیغام میں کہا کہ شدید گرمی میں سب سے اہم کام اپنے اردگرد کے لوگوں کو ائیر کنڈیشنڈ اور محفوظ مقامات فراہم کرنا ہے۔ انہوں نے شہریوں سے اپیل کی کہ وہ اپنے بزرگ رشتہ داروں اور پڑوسیوں کا خاص خیال رکھیں، ان کے لیے اے سی (AC) کا انتظام کریں اور انہیں شہر کے “کولنگ سینٹرز” (Cooling Centers) تلاش کرنے میں مدد کریں۔
انہوں نے خبردار کیا کہ گرمی کو ہلکا نہ لیا جائے کیونکہ یہ جان لیوا ثابت ہو سکتی ہے۔
نیویارک انتظامیہ نے ہنگامی صورتحال سے نمٹنے کے لیے پانچوں اضلاع (Boroughs) میں سیکڑوں کولنگ سینٹرز فعال کر دیے ہیں جو پبلک لائبریریوں، ہسپتالوں اور بزرگوں کے مراکز میں قائم ہیں۔ شہریوں کو پارکوں میں واٹر فاؤنٹین، اسپرے شاورز اور 27 جون سے مفت پبلک پولز کی سہولت بھی دستیاب ہوگی۔
ڈپٹی میئرز اور متعلقہ محکموں کے سربراہان نے واضح کیا ہے کہ شدید گرمی کے دوران کھلے آسمان تلے کام کرنے والے مزدور، بے گھر افراد اور دائمی امراض میں مبتلا لوگ سب سے زیادہ خطرے میں ہوتے ہیں۔
انتظامیہ نے شہریوں کو ہدایت کی ہے کہ وہ کسی بھی ہنگامی صورتحال، جیسے کہ چکر آنا، قے ہونا یا سانس لینے میں دشواری کی صورت میں فوری طور پر 911 پر کال کریں۔ مزید معلومات اور رہنمائی کے لیے شہری 311 پر رابطہ کر سکتے ہیں یا ‘Notify NYC’ سروس جوائن کر سکتے ہیں۔
