برلن / نیویارک: کھیلوں کا سامان بنانے والی دنیا کی مشہور ترین کمپنی ایڈیڈاس (Adidas) اور مقبول ترین انسٹنٹ میسجنگ پلیٹ فارم واٹس ایپ (WhatsApp) نے فیفا ورلڈ کپ 2026ء کے شائقین کے لیے ایک حیران کن اور جدید ترین اشتراک (Collaboration) کا اعلان کیا ہے۔ اس منفرد ڈیجیٹل مہم کے تحت دنیا بھر کی واٹس ایپ چیٹس میں سب سے زیادہ استعمال ہونے والے روایتی ’فٹ بال ایموجی‘ (Football Emoji) کو باقاعدہ طور پر ورلڈ کپ کی آفیشل میچ بال ’ٹرائی اونڈا‘ (Trionda) کے خوبصورت روپ میں تبدیل کر دیا گیا ہے۔
اس اپ ڈیٹ کے بعد، واٹس ایپ صارفین جب بھی اپنی گفتگو کے دوران فٹ بال کا ایموجی سینڈ کریں گے، تو وہ محض ایک عام اور ساکن بلیک اینڈ وائٹ آئیکن نظر آنے کے بجائے، فوری طور پر ورلڈ کپ کی آفیشل بال ’ٹرائی اونڈا‘ کے متحرک ڈیزائن اور رنگوں میں بدل جائے گا۔
آج کے ڈیجیٹل فینز کو ہدف بنانے کی کوشش: ٹیک اور اسپورٹس ماہرین کا کہنا ہے کہ بظاہر یہ ایک چھوٹی سی بصری تبدیلی معلوم ہوتی ہے، مگر اس کا اسٹریٹجک مقصد آج کے دور کے جدید فٹ بال فینز کو ہدف بنانا ہے۔ چونکہ فٹ بال کے متوالے اب میچ دیکھنے کے ساتھ ساتھ واٹس ایپ گروپ چیٹس، لائیو ری ایکشنز اور میچ ڈے میسجنگ کے ذریعے اپنے جذبات کا اظہار کرتے ہیں، اس لیے اس اقدام سے ورلڈ کپ براہِ راست کروڑوں صارفین کی روزمرہ کی ڈیجیٹل گفتگو کا لازمی حصہ بن جائے گا۔
’ٹرائی اونڈا‘ (Trionda) کا مطلب کیا ہے؟ واضح رہے کہ فیفا ورلڈ کپ 2026ء تاریخ میں پہلی بار مشترکہ طور پر تین ممالک یعنی امریکا، کینیڈا اور میکسیکو میں کھیلا جا رہا ہے۔ فیفا اور ایڈیڈاس کے مطابق ورلڈ کپ کی آفیشل گیند کا نام اسی تاریخی اور منفرد سیٹ اپ کو پیشِ نظر رکھ کر وضع کیا گیا ہے۔
اس نام میں شامل لفظ ‘Tri‘ تینوں میزبان ممالک کی اتحاد اور مشترکہ میزبانی کی علامت ہے، جبکہ ‘Onda‘ ہسپانوی اور پرتگالی زبان کا لفظ ہے جس کے معنی ’لہر‘ (Wave) کے ہیں۔ گیند کا متحرک اور جدید ترین ڈیزائن بھی اسی نظریے کے تحت تیار کیا گیا ہے، جس میں نظر آنے والی لہراتی ہوئی لکیریں اور گرافکس ان تینوں خطوں کے درمیان فٹ بال کے لازوال جنون اور ثقافتی بہاؤ کی عکاسی کرتے ہیں۔
