لاس اینجلس(ویب ڈیسک): امریکن آئیڈل کے 24ویں سیزن کے سنسنی خیز فائنل میں 25 سالہ ہینری ہارپر نے ٹائٹل اپنے نام کر لیا۔ تین گھنٹے طویل براہِ راست فائنل میں مسوری سے تعلق رکھنے والی تین بچوں کی ماں نے فائنلسٹ جارڈن میکلو اور کیلا رچرڈسن کو شکست دے کر کامیابی حاصل کی۔
ہینری ہارپر کی مقبولیت کا آغاز ان کے پہلے آڈیشن سے ہوا جہاں انہوں نے ‘پوسٹ پارٹم ڈپریشن’ (زچگی کے بعد کے ذہنی دباؤ) سے متاثر ہو کر لکھا گیا اپنا اصل گیت ‘سٹرنگ چیز’ (String Cheese) پیش کیا۔ یہ ویڈیو سوشل میڈیا پر 120 ملین سے زائد مرتبہ دیکھی گئی اور پروگرام کی تاریخ کے مقبول ترین کلپس میں شامل ہو گئی۔ جج کیری انڈروڈ نے اس گیت کو اب تک کا سب سے زیادہ اثر انگیز گیت قرار دیا۔
جیت کے بعد جذباتی ہوتے ہوئے ہینری نے کہا کہ وہ خوشی سے رو رہی تھیں۔ موسیقی کے سفر سے پہلے وہ ایک ورشپ لیڈر تھیں اور فزیکل تھراپی میں کیریئر بنانا چاہتی تھیں، تاہم ٹک ٹاک پر ان کی ویڈیوز کی مقبولیت نے انہیں امریکن آئیڈل تک پہنچا دیا۔ فائنل میں ایلیسیا کیز، لیوک برائن اور لیونل رچی سمیت بڑے گلوکاروں نے بھی پرفارم کیا۔
