ٹوکیو (رائٹرز): مائیکروسافٹ نے جاپان میں مصنوعی ذہانت (AI) کے بنیادی ڈھانچے کی توسیع اور سائبر سیکیورٹی کو مضبوط بنانے کے لیے 2026 سے 2029 کے درمیان 1.6 ٹریلین ین (تقریباً 10 ارب ڈالر) کی بھاری سرمایہ کاری کا اعلان کیا ہے۔
مائیکروسافٹ کے وائس چیئرمین اور صدر بریڈ سمتھ نے ٹوکیو کے دورے کے دوران اس منصوبے کی تفصیلات بتاتے ہوئے کہا کہ کمپنی 2030 تک جاپان میں 10 لاکھ انجینئرز اور ڈویلپرز کو تربیت دے گی۔
یہ اقدام جاپانی وزیراعظم ثناء تاکائچی کے اس وژن کے عین مطابق ہے جس کا مقصد جدید ٹیکنالوجی کے ذریعے معاشی ترقی کو فروغ دینا اور قومی سلامتی کو یقینی بنانا ہے۔
مائیکروسافٹ جاپان میں ‘اے آئی کمپیوٹنگ’ کی صلاحیت بڑھانے کے لیے سافٹ بینک (SoftBank) اور ساکورا انٹرنیٹ (Sakura Internet) جیسے مقامی اداروں کے ساتھ مل کر کام کرے گا۔
اس شراکت داری کا سب سے بڑا فائدہ یہ ہوگا کہ جاپانی کمپنیاں اور سرکاری ادارے مائیکروسافٹ کی کلاؤڈ سروسز استعمال کرتے ہوئے اپنا حساس ڈیٹا ملک کے اندر ہی محفوظ رکھ سکیں گے۔
منصوبے کے تحت سائبر خطرات اور جرائم کی روک تھام کے لیے جاپانی حکام کے ساتھ انٹیلی جنس شیئرنگ کو مزید گہرا کیا جائے گا۔
مائیکروسافٹ کے اعداد و شمار کے مطابق، جاپان میں ہر پانچ میں سے ایک ملازمت پیشہ شخص ‘جنریٹو اے آئی’ ٹولز استعمال کر رہا ہے، تاہم حکومت کا اندازہ ہے کہ 2040 تک جاپان کو AI اور روبوٹکس کے شعبے میں 30 لاکھ سے زائد ورکرز کی کمی کا سامنا ہو سکتا ہے۔
