نیویارک(ویب ڈیسک): نیویارک سٹی کے میئر زہران ممدانی نے کوئنز (Queens) کے علاقے رچمنڈ ہل میں ہولی کے ہند-کیریبین تہوار “پھگواہ” (Phagwah) کی سالانہ پریڈ میں بھرپور شرکت کی۔ اس رنگا رنگ تقریب میں ہزاروں افراد نے حصہ لیا، جس نے سڑکوں کو موسیقی، ثقافت اور روایتی رنگوں سے بھر دیا۔
38 ویں سالانہ پھگواہ پریڈ اتوار کے روز لبرٹی ایونیو سے شروع ہوئی، جہاں میئر ممدانی نے ہندو کمیونٹی اور خاص طور پر ہند-گیانی (Indo-Guyanese) شہریوں کے ساتھ مل کر مارچ کیا۔ ہولی کا یہ تہوار، جسے ہند-کیریبین خطے میں ‘پھگواہ’ کہا جاتا ہے، بھگوان رادھا اور کرشن کی محبت، برائی پر اچھائی کی جیت اور بہار کی آمد کی علامت ہے۔
سوشل میڈیا پلیٹ فارم ‘ایکس’ (X) پر اپنی پوسٹ میں میئر زہران ممدانی نے خوشی کا اظہار کرتے ہوئے کہا کہ رچمنڈ ہل میں ہند-کیریبین برادری کے ساتھ یہ جشن منانا ایک یادگار تجربہ تھا۔ انہوں نے مزید کہا کہ اس سال کی پریڈ پہلے سے کہیں زیادہ جاندار تھی اور نیویارک شہر بہار کو خوش آمدید کہنے کے لیے پوری طرح تیار ہے۔
پریڈ کا اختتام اسموکی اوول پارک (فلم Rizutto Park) پر ہوا، جہاں بڑی تعداد میں لوگوں نے ایک دوسرے پر گلال مل کر اور گیت گا کر خوشیاں منائیں۔ یہ تہوار نہ صرف مذہبی اہمیت رکھتا ہے بلکہ نیویارک کی متنوع ثقافتی شناخت کا بھی عکاس ہے۔
