کینیڈا(ویب ڈیسک): فٹبال کے عالمی شہرت یافتہ اسٹار لیونل میسی کو اکیسویں صدی کا بہترین ایتھلیٹ قرار دیا گیا ہے۔
کینیڈا کے معروف اخبار لی ژورنال دے کیوبک کی جانب سے جاری کی گئی عالمی درجہ بندی میں میسی نے تمام کھیلوں کے بڑے ستاروں کو پیچھے چھوڑتے ہوئے پہلی پوزیشن حاصل کی۔ یہ فہرست اکیسویں صدی کے پہلے پچیس سال مکمل ہونے پر تیار کی گئی، جس میں مختلف کھیلوں کے 25 نمایاں کھلاڑی شامل ہیں۔
فہرست میں دوسرے نمبر پر امریکی فٹبال کے مشہور کھلاڑی ٹام بریڈی اور تیسرے نمبر پر اولمپکس کے سب سے کامیاب ایتھلیٹ مائیکل فیلپس آئے۔ خواتین ٹینس کی لیجنڈ سرینا ولیمز چوتھے، دنیا کے تیز ترین انسان یوسین بولٹ پانچویں اور باسکٹ بال کے سپر اسٹار لیبرون جیمز چھٹے نمبر پر رہے۔
میسی کے دیرینہ حریف کرسٹیانو رونالڈو اس فہرست میں دسویں پوزیشن پر ہیں، جن سے اوپر نوواک جوکووچ، سیمون بائلز اور مرحوم کوبی برائنٹ شامل ہیں۔ اس کے علاوہ دیگر عظیم کھلاڑی جیسے ٹائیگر ووڈز، راجر فیڈرر، رافیل نڈال، اسٹیفن کری، لیوس ہیملٹن، مائیکل شوماخر، شوہے اوہتانی اور مارٹا بھی اس فہرست میں شامل ہیں۔
میسی اس وقت امریکی کلب انٹر میامی اور ارجنٹائن کی قومی ٹیم کے کپتان ہیں۔ 2022 میں انہوں نے قطر میں ورلڈ کپ جیت کر اپنے کیریئر کا سب سے بڑا ہدف حاصل کیا۔ رواں ماہ میسی نے انٹر میامی کو اپنی تاریخ کی پہلی میجر لیگ سوکر چیمپئن شپ بھی دلائی، اور گولڈن بوٹ کے ساتھ ساتھ مسلسل MVP ایوارڈز سے بھی نوازے گئے۔
کلب فٹبال میں میسی نے بارسلونا کے ساتھ 10 بار لا لیگا اور 4 مرتبہ یوئیفا چیمپئنز لیگ جیتیں، جبکہ پیرس سینٹ جرمین کے ساتھ بھی کامیابیاں حاصل کیں۔ ان کی شاندار اور مستقل کارکردگی نے انہیں جدید فٹبال کا سب سے بڑا نام بنا دیا ہے۔ میسی کا انٹر میامی کے ساتھ معاہدہ 2028 تک ہے۔
