نیویارک : سوشل میڈیا کی دنیا کی سب سے بڑی کمپنی ‘میٹا’ (Meta) کو جمعہ، 12 جون 2026ء کی شام ایک بڑے عالمی تعطل (Global Outage) کا سامنا کرنا پڑا، جس کے باعث فیس بک، میسنجر، انسٹاگرام اور واٹس ایپ کی سروسز بری طرح متاثر ہوئیں۔
ذرائع کے مطابق یہ خرابی متحدہ عرب امارات (UAE) کے وقت کے مطابق شام تقریباً 5:45 بجے شروع ہوئی۔ آؤٹیج مانیٹرنگ ویب سائٹس پر چند ہی منٹوں میں ہزاروں صارفین نے شکایات درج کروائیں۔ رپورٹ کے مطابق فیس بک اس تعطل سے سب سے زیادہ متاثر ہوا، جہاں لاکھوں صارفین اپنے اکاؤنٹس سے اچانک لاگ آؤٹ ہو گئے اور درست پاس ورڈ درج کرنے کے باوجود دوبارہ لاگ ان کرنے میں ناکام رہے۔ لاگ ان کی کوشش پر صارفین کو “unexpected error occurred” کا پیغام موصول ہو رہا تھا، جبکہ فیس بک کی مرکزی ویب سائٹ پر لکھا آیا کہ “کچھ خرابی پیدا ہوئی ہے اور کمپنی اسے جلد از جلد ٹھیک کرنے کی کوشش کر رہی ہے”۔
اسی دوران انسٹاگرام اور واٹس ایپ پر بھی اسی نوعیت کی شکایات سامنے آئیں، جہاں صارفین کو لاگ ان کرنے، فیڈ لوڈ ہونے میں تاخیر اور پیغامات بھیجنے یا وصول کرنے میں شدید دشواری کا سامنا کرنا پڑا۔
دلچسپ بات یہ ہے کہ دنیا بھر میں ویب سائٹس ڈاؤن ہونے پر نظر رکھنے والا مشہور پلیٹ فارم ‘ڈاؤن ڈیٹیکٹر’ (Downdetector) بھی میٹا کی سروسز بند ہونے کے فوراً بعد خود بھی آف لائن ہو گیا۔ تاہم آف لائن ہونے سے قبل ڈاؤن ڈیٹیکٹر نے میٹا کی تمام مصنوعات پر دنیا بھر سے آنے والی شکایات کے غیر معمولی اضافے کو ریکارڈ کر لیا تھا۔ میٹا انتظامیہ کی جانب سے اس عالمی تکنیکی خرابی کی اصل وجہ تاحال سامنے نہیں آئی ہے۔
